Ég geri allt og þú ekki neitt – Algengt umkvörtunarefni hjá pörum

Þau eru mörg verkefnin sem inna þarf af hendi á hverju heimili auk þess sem hver og einn hefur
yfirleitt mikið á sinni könnu utan veggja heimilisins. Algengt umkvörtunarefni para eða hjóna er
upplifun á ójafnri verkaskiptingu á heimilinu. Annar aðilinn upplifir sig gera margt, jafnvel allt,
og hinn sé ekki að taka eins mikinn þátt. Algengt er að parið upplifi stöðu sína á afar mismunandi
hátt. Dæmi um þetta getur verið að á meðan öðrum aðilanum finnist hann þurfa að sjá um allt
upplifir hinn að það sé alveg sama hvað hann geri, það sé aldrei nógu gott. Algeng viðbrögð eru
að draga sig í hlé þegar væntingar makans til verkaskiptingar eru ekki skýrar. Á sama tíma eykst
kergjan hjá makanum og hann sýnir enn meiri reiði og pirring. Krefjandi vítahringur er kominn í
samskipti parsins og oft á fólk erfitt með að finna leiðina út úr honum. Þetta myndar
samskiptavanda og gjá í parsambandið sem skilur eftir sig erfiðar tilfinningar þar sem fólk getur
upplifað einsemd, vonleysi, vanmátt, skilningsleysi, skort á virðingu og nánd.


Það er gagnlegt fyrir öll pör að setjast niður reglulega og fara yfir stöðuna á praktískum málum,
s.s. eins og hver á að skutla og sækja börnin, hver ætli að sjá um eldamennsku, þrif og þvotta, slá
grasið, þvo bílinn, greiða reikninga, sjá um viðhald, hvernig lítur vinnuvikan út, minna á viðburði
í komandi viku s.s. æfingar, saumaklúbb og hittinga eftir vinnu. Einnig er gott að ræða líðan
hverju sinni og ef viðkomandi hefur upplifað eitthvað ósanngjarnt í vikunni að ræða það á þessum
fundum. Þetta er sérstaklega mikilvægt fyrir pör sem glíma við samskiptavanda af einhverju tagi.
Þessir fundir eru stundum kallaðir „hjónafundir”. Þeir geta minnkað árekstra og þjálfað upp betra
samtal á milli parsins. Þá er hægt að geyma umræðuefni sem geta verið eldfim í stað þess að
skella þeim á borðið, í tíma og ótíma. Meiri líkur eru á árangursríku samtali þegar báðir aðilar
hafa tekið frá tíma og eru undir það búnir. Því skaltu núna ræða við maka þinn um hvort svona
vikulegir fundir gætu gagnast ykkur til að minnka álag og bæta samskipti ásamt því hvenær í
vikunni ykkur hentar að festa tíma til að ræða ykkar mál, bæði praktísk og persónuleg.


Gangi ykkur vel!

Leitum okkur aðstoðar þegar viðvörunarljósin kvikna

Við förum með bílinn í skoðun einu sinni á ári. Við pössum uppá að dekk séu góð og hæfi árstíðum þannig að við getum ekið stöðug við misjafnar aðstæður, förum á verkstæði ef viðvörunarljós kviknar.

Við pössum upp á bensínstöðuna því við viljum komast alla leið.

Við förum á verkstæði ef viðvörunarljós kveiknar eða eitthvað er ekki að virka til fulls því við viljum vera örugg og forðast kostnaðarsamar viðgerðir Kannski ættum við að hugsa um fjölskylduna og samböndin á líkan hátt þ.e taka stöðuna reglulega, vera vakandi fyrir líðan og velferð fjölskyldumeðlima, bregðast við og leita okkur aðstoðar ef viðvörunarljós kvikna.

Slíkt stuðlar að hamingju og gæti komið í veg fyrir sársaukafullar viðgerðir síðar meir.